ព្រឹត្តិការណ៍នេះ នឹងធ្វើឡើង បន្ទាប់ពីមានការបង្ក្រាបទៅលើបាតុករយ៉ាងព្រៃផ្សៃដោយការបាញ់ គ្រាប់ពិត ទៅលើកម្មករកាត់ដេរដែលធ្វើកូដកម្ម កាលពីថ្ងៃសុក្រ នៅផ្លូវ វ៉េងស្រេង ដែលបានសម្លាប់មនុស្សយ៉ាងហោចណាស់ ៤ នាក់ និងរងរបួសជិត ៤០ នាក់ហើយកងកម្លាំងរបស់រដ្ឋាភិបាលបានរងរបួស ៣០ នាក់ ហើយកាលពីថ្ងៃសៅរ៍កងកម្លាំងរបស់រដ្ឋាភិបាលបានទៅវាយបណ្តេញអ្នក គាំទ្រគណបក្សសង្គ្រោះជាតិចេញពីទីលានប្រជាធិបតេយ្យ។
សាលារាជធានីភ្នំពេញបានធ្វើការហាមឃាត់បាតុកម្មជាសាធារណៈ បន្ទាប់ពីមានការបង្ក្រាបហិង្សានោះ បើទោះបីជាការប្រារព្ធខួប ៧ មករា ជាប្រចាំឆ្នាំដោយគណបក្សប្រជាជនកម្ពុជានឹងបន្តដោយគ្មានការរាំង ស្ទះក៏ដោយ។
៧ មករា ឆ្នាំ ២០១៤ នេះ គឺជាឆ្នាំខួបលើកទី ៣៥ នៃការវាយផ្តួលរលំរបបខ្មែរក្រហមដោយកងទ័ព វៀតណាម កាលពីថ្ងៃ ទី៧ ខែ មករា ឆ្នាំ ១៩៧៩ ដែលមេដឹកនាំគណបក្សប្រជាជនបានចាត់ទុកថ្ងៃនេះថា ជាថ្ងៃកំណើតទីពីរ ដែលបានជួយរំដោះប្រជាជនកម្ពុជា ចេញពីរបបអាវខ្មៅខ្មែរក្រហម ដែលបានកាប់សម្លាប់បង្អត់អាហារ បង្ខំឲ្យធ្វើការលើសកម្លាំង ធ្វើឲ្យប្រជាជនកម្ពុជាស្លាប់អស់ជិតពីរលាននាក់។
ទោះជាយ៉ាងណា គណបក្សសង្គ្រោះជាតិ មើលឃើញថ្ងៃ ៧ មករា ថា ជាការចាប់ផ្តើមនៃការកាន់កាប់របស់វៀតណាមមកលើកម្ពុជា ដែលគេជឿជាក់ថា កំពុងបន្តរហូតមកដល់សព្វថ្ងៃនេះក្នុងទម្រង់ជាឥទ្ធិពលនយោបាយពី ទីក្រុង ហាណូយ បើទោះបីជាមានការដកទ័ពជាផ្លូវការក្នុងឆ្នាំ ១៩៨៩ ក៏ដោយ។
ពាក្យសម្តីរិះគន់ខ្លាំងៗរបស់គណបក្សសង្គ្រោះជាតិ ប្រឆាំងនឹងជនអន្តោប្រវេសន៍វៀតណាមបានទាក់ទាញទឹកចិត្តរបស់អ្នក បោះឆ្នោតយ៉ាងខ្លាំង ក្នុងរយៈពេលរហូតដល់ការបោះឆ្នោតកាលពីខែ កក្កដា ហើយអារម្មណ៍ប្រឆាំង វៀតណាម ហាក់ដូចជាកើនឡើងក្រោយការបោះឆ្នោត។
បើយោងតាមអាជ្ញាធរមូលដ្ឋានបានឲ្យដឹងថា កាលពីថ្ងៃសុក្រ ហាងកាហ្វេ វៀតណាម មួយកន្លែងនៅផ្លូវ វ៉េងស្រេង បានរងការវាយប្រហារនិងលួចទ្រព្យសម្បត្តិដោយបាតុករ។
ហ្វូងបាតុករនិងពលរដ្ឋក្នុងអំឡុងការបង្ក្រាបដោយនគរបាលនាពេល ថ្មីៗនេះ ក៏បានថ្លែងផងដែរថា ពួកគេជឿជាក់ថា អាជ្ញាធរកំពុងតែប្រើប្រាស់មន្រ្តី វៀតណាម ដើម្បីប្រព្រឹត្តអំពីហិង្សា។
គណបក្សកាន់អំណាចហាក់ដូចជាដឹងអំពីភាពតានតឹងដែលនឹងបង្កើតឡើងដោយព្រឹត្តិការណ៍ថ្ងៃនេះ។
លោក ជាម យៀប តំណាងរាស្រ្តគណបក្សប្រជាជន បានថ្លែងកាលពីម្សិលមិញថា៖ «ការបង្ក្រាបនាពេលថ្មីៗនេះលើបាតុកម្មគឺជាវិធានការមួយ ដើម្បីបង្ការបាតុករអនាធិបតេយ្យដែលអាចយកឱកាសនេះមកតវ៉ាប្រឆាំងនឹង ព្រឹត្តិការណ៍របស់យើង និង វៀតណាម»។ លោកបានបន្ថែមថា ការអបអរសាទរ នឹងធ្វើឡើងនៅទូទាំងប្រទេស។
លោក អ៊ូ វីរៈ ប្រធានមជ្ឈមណ្ឌលសិទិ្ធមនុស្សកម្ពុជាដែលបានបង្ហាញខ្លួនជាសំឡេងតែ មួយ ក្នុងចំណោមក្រុមសិទិ្ធមនុស្សប្រឆាំងនឹងពាក្យសម្តីប្រឆាំង វៀតណាម របស់គណបក្សប្រឆាំងនោះបានថ្លែងថា លោកព្រួយបារម្ភថា ព្រឹត្តិការណ៍ហិង្សាប្រឆាំង វៀតណាម អាចកើតឡើងនៅថ្ងៃនេះ។ លោកបន្ថែមថា ការគំរាមបន្តបង្ក្រាបរបស់រដ្ឋាភិបាលក៏ជាក្តីបារម្ភផងដែរ។ លោកគិតថា៖ «វាអាចទៅទាំងពីរផ្លូវ ហើយគណបក្សប្រជាជនអាចព្យាយាមស្វែងរកលេសមកបង្ក្រាបការជជែកដ៏ ត្រឹមត្រូវអំពីថ្ងៃនេះ។ ខ្ញុំគិតថា ភាគីទាំងពីរត្រូវចេញមុខជាសាធារណៈ ហើយអំពាវនាវឲ្យមានការជជែកដោយសន្តិវិធី»។
មេដឹកនាំគណបក្សប្រឆាំងលោក សម រង្ស៊ី បានថ្លែងកាលពីម្សិលមិញថា លោកជឿថា ការបង្ក្រាបកាលពីចុងសប្តាហ៍មុនគឺជាផ្នែកមួយនៃការរៀបចំឡើង ដើម្បីធានាថា បាតុកម្មប្រឆាំងរដ្ឋាភិបាលនឹងមិនអាចប៉ះពាល់ចំពោះការអបអរសាទរថ្ងៃ ៧ មករា របស់គណបក្សប្រជាជននោះទេ។
លោកបន្តថា៖ «ពិតណាស់ មានការជាប់ពាក់ព័ន្ធរវាងព្រឹត្តិការណ៍ទាំងពីរនេះ។ ការពិតដែលថ្មីៗនេះមានមហាបាតុកម្មខ្លាំងក្លាគាំទ្រគណបក្ស ប្រឆាំង... ដូច្នេះនៅពេលគណបក្សប្រជាជនប្រារព្ធថ្ងៃ ៧ មករា ពួកគេពិតណាស់មិនអនុញ្ញាតឲ្យមានបាតុកម្មបន្តទៅទៀតទេ»។
អ្នកនាំពាក្យគណបក្សប្រឆាំង លោក យឹម សុវណ្ណ បានថ្លែងថា គណបក្សប្រឆាំងបានអំពាវនាវឲ្យអ្នកគាំទ្ររបស់ខ្លួនរក្សាភាពស្ងប់ ស្ងាត់និងថ្កោលទោសចំពោះការវាយប្រហារទៅអាជីវកម្ម វៀតណាម។ លោកបានថ្លែងបន្តថា៖ «យើងថ្កោលទោសចំពោះការវាយប្រហារហិង្សាណាមួយ ហើយយើងអំពាវនាវឲ្យប្រជាជនទាំងអស់គោរពម៉ឺងម៉ាត់នូវគោលការណ៍ អហិង្សា»។
អ្នកនាំពាក្យស្ថានទូត វៀតណាម លោក Tran Van Thong បានថ្លែងថា ស្ថានទូតបានទទួលព័ត៌មានថា ក្រុមអ្នកតវ៉ា «ជាតិនិយមជ្រុល» មួយចំនួនបានវាយប្រហារទៅលើហាងអាជីវកម្មមួយចំនួនដែលជាកម្មសិទ្ធិ របស់ជនជាតិ វៀតណាម បន្ទាប់ពីការ «ញុះញង់» នោះ។ «យើងមិនបារម្ភអំពីអារម្មណ៍ប្រឆាំងជនជាតិ វៀតណាម របស់ក្រុមអ្នកតវ៉ាទាំងនោះទេ ពីព្រោះរដ្ឋាភិបាលកម្ពុជាគ្រប់គ្រងប្រទេសស្របទៅតាមច្បាប់ ហើយប្រជាជនកម្ពុជាភាគច្រើនចិត្តល្អជាមួយប្រជាជន វៀតណាម»។
ប៉ុន្តែលោក សឺន ស៊ូប៊ែរិ៍្ត ប្រធានគណបក្សសិទ្ធិមនុស្ស និងជាទីប្រឹក្សាព្រះមហាក្សត្រនរោត្តម សីហមុនី បានថ្លែងថា លោកជឿថា បាតុករទាំងអស់នោះមិនអាចគ្រប់គ្រងបានដោយការហាមឃាត់របស់គណបក្ស ទេ។
លោក បានបន្តថា៖ «អ្នកមិនអាចគ្រប់គ្រងពួកគេបានទេ។ ដូច្នេះប្រសិនបើពួកគេចង់បង្ហាញអំពីអារម្មណ៍របស់ពួកគេពួកគេអាច ធ្វើវាដោយខ្លួនឯង»៕ TK/PS
0 comments:
Post a Comment